Rom 12 | ASO | STEP | Nemu' nene neze zuhokizo, O'moso'mo ne'mino muhelete ningo isete izaa' neine' nenako nemu' nene naza agae lo do upuho' o-lengedo gatine do ti' lo nolo-lingimuve: Ize ato ato' ngibili O'moso lehizi-daa' ani' ne'mine igi lingine okodine nene di kekeize li O'moso'mi monovolokovo' di milikevosa O'moso'mo lanite' gelelido' lisihe' o minivo a'mine okodine nene lehizi-dilo. Ido' lehizi-dilizani' okodine nene hele neivosa nevoba asi velesi ha minevo' dovo' neido' nesi nene lehizi-dilo. Ne'mine ilizani' neve nene mo madu'ningu' gamazi neivete iga' ilizani' o neine' inite' nenako a'mido' nene ha ilisave.

Romans 12

Laza Nene Okode Lute O'moso Lehize-do Gono've Daloningumu' Nene O'moso'mo Limine' Amuzo Ato Atodunu' Nene Hamo' Hamo' Amuzo Molo Ogo Molo Olosune Lo Paulo' Line' Gamazi

1 Nemu' nene neze zuhokizo, O'moso'mo ne'mino muhelete ningo isete izaa' neine' nenako nemu' nene naza agae lo do upuho' o-lengedo gatine do ti' lo nolo-lingimuve: Ize ato ato' ngibili O'moso lehizi-daa' ani' ne'mine igi lingine okodine nene di kekeize li O'moso'mi monovolokovo' di milikevosa O'moso'mo lanite' gelelido' lisihe' o minivo a'mine okodine nene lehizi-dilo. Ido' lehizi-dilizani' okodine nene hele neivosa nevoba asi velesi ha minevo' dovo' neido' nesi nene lehizi-dilo. Ne'mine ilizani' neve nene mo madu'ningu' gamazi neivete iga' ilizani' o neine' inite' nenako a'mido' nene ha ilisave. 2 Me misubou' minine' monovo danava goloso nene di otuhi minamilo. Asi O'moso'mo lutine gatine do gosoho' o-lengedavo ne'mo nene a'mine gomu' lengemeni dameni do hulosa nene do ato' o-lengedavo minilo. Ne'mine ilizani' nene O'moso'mo igi mili minilizave lo gele neine' monovo ado' monovo lamine' ei' gilido' gehepeve vo daa' neine' monovo ado' aza a'minemu' lanite' gelelido' lisihe' o neine' monovo nene igi mili minilizani' nenako neloti' nene ei' gelaa' neine' monovo nene ningi gililisave.

3 Ido' O'moso'mo nasahili' o-nedo neni' mo'mosi'ne mene lehize-nidine' nenako nemu' nene naza lingine luvoni' ne'mine ilizangumu' ve losa nene lengi' hamo hamo' nene ti' lo nolo-lingimuve: Lingine O'mosomu' gili ele'vole' ikevo amuzo lingimine' nene hamo hamo' nani amuzo lingimihe ne'mi votigile gehepevelo' di milisa lengikumu' gilavo a'mine votigile ivile' ogo dizalinaze. Lengikumu' nene gili vevesisa minilo. 4 Lingine ne'mine ilizave lo noluvoni' nene nemu' noluve: Evene' okodelo' nene gizede ade ne'mine inite' nene ato ato' vai' goloso neivo ingine mini gono'ine daa' nani' nene ato ato' gono daa' nave. 5 A'mine'mine ogo Kilisitoda nene evene' muki' laza oko'no hamo' ne'mine lolo' ogo ato ato' minamo ne hize ele' o-gede ge hize ele' o-nede lo minelonive nene none. 6 Ido' O'moso'mo nasahili' o-ledo amuzo lehize-ledine' nene hamoli'minevo' lehize-ledamo ato atoli'mine lehize-lidine' ve. Nemu' nene O'moso'mo ve ma lehize-lede noline' amuzo nene O'moso'mi veleti' gamazi lo soto soto' oga' amuzo noline' nene laza mo la'lisete gele ele'vole' o nolone' votigilelo' nene do molosa O'moso'mi veleti' gamazi nene lo soto soto' ogo lolosune. 7 Ido' ve malite evene' ma hize ele' o-ngedaa' amuzo lehize-lede noline' nene mo ha evene' hize ele' o-ngedo minelesune. Ido' evene' inite' ma apize ngemaa' amuzo lehize-lede neine' neivo ma nene mo ha apize ngemo minelesune. 8 Ido' evene' ga'ine do gamazi lo-ngemaa' amuzo ma lehize-lede neine' neivo ma nene ha mo ga'nine do gamazi lo-ngemaa' olosune. Ido' ve ma nene inite' ize' molo ngemaa' amuzo lehize-de nolive ne'mo nene mo inele ogo ngemeleseive. Ido' ve mali'mo nene gomu' molo-ngemaa' amuzo do noline' nene a'mine gono've nene amuzo molo do mineleseive. Ido' ve ma aza nasahili' o-ngedaa' amuzo do nolive ne'mo nene nasahili' o-ngedaaku' nene olize izo minosa ne'mine ilive.

Mono' Alevete Igi Mili Ilizani' Monovo Gihile Nene Do Mineloningumu' Paulo' Line' Gamazi

9 Lingine evene' lutine ngimaa' naani' monovo nene abeleni ne'mine nomivo mo lutine ngimi gehepeve igi minilo. Monovo golosomu' nene gosele' lengebelavo mehedine imivo' mini monovo lamineto' nene gi'mizi gili' li minilo. 10 Hamo' zuho lili' igi nizanako nemu' nene hamo' zuholite lu'ine ne geme ge neme li minilizani' votigilelo' di mili lutine amuzo mili ge neme ne geme li minilo. Ido' evene' di naba i-ngidaa' monovomu' nene aka ge nelebize ne gelebize li minilo. 11 Monoku' mini gonotine di di vi minaa' naani' nene gosele' lengebelamivo mini Guvelesi ve nene lutine gilingili ivo gelekele' i-di minilo. 12 Lingine Kilisito' do lamine' o-ledelesa neive li gili mu'musi' igi gizebo nizani' nenako nemu' a'mingu' nene longolizesi izisa minilo. Ido' geni inite' lengita soto' ilingumu' nene monotine hulami a'mine geni nene hongu li mini gihi minilo. Ido' O'mosola li minilizani' nene hulami laakovo' igi minilo. 13 O'moso'mi evenele linge malite inite' mamu' vise' naavo ma nene hize ele' i-ngidi ma ngimilo. Ido' venenga ve ne'mine ma nimonavo ma nene ngele'mize lamine' i-ngidi nasahili' i-ngidilo.

14 Lengi' goboni mili-lingidilizavemu' nene O'moso'mo no'noho' ize-ngedelive li ezela lilo. Ee, usi' ize-ngedelive lamisa asi no'noho' ize-ngedelingumu' nene eita lilo. 15 Ido' ve ma ingine inite' mamu' ngolize izi nizavo ma nene linginesi a'mingu' mini makato' longolize izi minilo. Ido' ve ma ingine inite' mamu' mulumo alumo gili nizavo ma nene linginesi a'mingu' mini mili makato' mulumo alumo gili minilo. 16 Lingine lengi' hamo hamokumu' nene di dizi limi gilami asi hamo' monovolo' nene di milisa minilo. Ee, lengi' okodine nene di dizami asi evene' limi minavesi nene bizi monilo. Ido' la'mo nene otohato ve none li okodine di dizamilo.

17 Evene' malite di goloso i-lingidikevo ma nene a'mido' di tine' mili di goloso i-ngidamilo. Asi evene' mukiliti ve'nido' nene monovo lamine' ogave li ningilizani' monovovo' nene igi mili minilo. 18 Lingine evene' ato ato' mukikisi lovo lolize ami hongu li laminivo' minilizani' aka ma neivo ma nene a'mine akalokovo' nene e'meti minilo. Lengitati' neve nene lovo lolize di soto' amilo. 19 Lu'ne lengeme nouvoni' alevekizo, evene' malite lutine di goloso igi lihime nimili-lingidavo ma a'mido' golo hizi a'mine'mine i-ngidamilo. Asi O'moso'mo izebolo' molavo lihime ngemelize. Ningi mati ngimikilo. A'mine nemu' mono' godolou' ti' li gizi nizani' ma neive:

Guvelesi ve'mo ti' lo line' ve:
Lihime ngemaa' gono nene neni' gono nenako
lihime nene neni' ngemelesuve.
20 Mo ne'mine igi langisetine nene lihime ngimamilisaha mono' godolou' ti' li gizi nizado' nene e'metilisave:

Lengi' biluva' i-lingidaa' nave ingine ga'na hili nizavo ma nene
di ve'ine milalo.
Ido' nosomu' ga'na hili nizavo ma nene noso ngimilo.
Lingine ne'mine i-ngidilizani' ne'mo nene
ngovozo naba goloso nene engita dizavo
olo' vele nene godo'nido' mili-ngidani' geleleseive.
21 Ido' goloso monovo ne'mo nene lingivile' ogalize. Asi monovo lamine' igi mili minilizani' ne'mo nene monovo goloso nene ivile' igi di limi-di minilo.